WAKUSANYAJI MAPATO WATUNUKIWA VYETI LUSHOTO DC, MIKAKATI YA KUBORESHA UKSANYAJI KWA MWAKA WA FEDHA 2025 - 2026 YAWEKWA

Imetumwa: August 27th, 2025

HALMASHAURI ya Wilaya ya Lushoto imewatunuku vyeti vya pongezi Watendaji Kata, Maafisa Ugani pamoja na Waganga Viongozi  waliofanya vizuri Katika ukusanyaji wa mapato kwa Mwaka wa Fedha 2024 - 2025 na Kuweka mikakati ya kuboresha ukusanyaji Katika Mwaka wa Fedha 2025 - 2026.

Vyeti hivyo vilikabidhiwa na Mkurugenzi Mtendaji wa Halmashauri ya Wilaya ya Lushoto, Dkt. Ikupa Harrison Mwasyoge wakati wa Kikao kazi cha kuweka mikakati ya kuboresha ukusanyaji wa mapato kwa Mwaka huu wa Fedha wa 2025 - 2026 , kikao hicho kilifanyika Katika Ukumbi wa Mikutano wa Halmashauri.

Katika Kikao hicho mbali na Uongozi kuwatambua wakusanyaji Bora wa mapato kwa Mwaka wa fedha uliopita, lakini pia ilifanyika tathmini mwenendo wa mapato Katika Mwaka wa fedha 2024 - 2025.

Akizungumza wakati wa Kikao hicho, Dkt. Mwasyoge aliwataka watumishi hao kukusanya mapato kwa bidii, ili kila Mmoja aweze kufikia malengo ya ukusanyaji waliyowekewa kwa Mwaka wa fedha 2025 -  2026.

Katika Mwaka wa fedha 2024 - 2025 Halmashauri ya Wilaya ya Lushoto ilifanikiwa kuvuka lengo kwa kukusanya zaidi ya Asilimia 100 ya mapato ambayo yalikadiriwa kwenye bajeti.

Watendaji Kata na Maafisa Ugani ambao walikabidhiwa vyeti ni kutoka Kata za Shume, Manolo, Lukozi, Lushoto, Kwai, Kilole, Ngwelo, Malindi na Magamba.